Der Untergang
რუსულ და ალბათ ქართულ თარგმანშიც ამ ფილმს ”ბუნკერი” ქვია.
იმიტომ, რომ ჰიტლერისა და ფაშისტური (როგორც თვითონ გერმანელები ეძახიან, ნაცისტური) გერმანიის ბოლო დღეებზეა. და მოქმედებაც ძირითადად ბუნკერში ხდება.
და ალბათ იმიტომაც, რომ სიტყვა ”Der Untergang” ისე სრულყოფილად არ ითარგმნება, რომ მთლიანად გადმოსცეს შინაარსი. ალბათ უფრო დაცემას ნიშნავს. დაღუპვასაც. დაახლოებით ამ დიაპაზონშია.
ამ წუთას მოვრჩი ყურებას. არ ვიცი, რა ვთქვა. საერთოდ არ ვიცი, რატომ დავჯექი დასაწერად. უბრალოდ მინდა ყველას გირჩიოთ - უყურეთ. და დიალოგებს უსმინეთ. და ინერვიულებთ მაგრად.
მეორე მსოფლიო ომის თემა ამოუწურავია, როგორც ჩანს. ზუსტად 70 წელიწადია გასული და ალბათ უთვალავი ნაშრომი შეიქმნა ამ თემაზე - მეცნიერული თუ კულტურული. შემზარავი და ამავე დროს, მიმზიდველი თემაა.
შემზარავი იცით როდისაა?
როცა ერთ-ერთი გერმანელი გენერალი ცოლთან და ორ თუ სამ შვილთან ერთად სავახშმოდ ჯდება, ჯიბიდან ჩუმად იღებს ორ ხელყუმბარას და გაღიმებული უყურებს ოჯახის წევრებს, რომლებიც ვერ ხედავენ მის ხელებს მაგიდის ქვეშ...
არ ვიცი მეტი რა ვთქვა. ვისაც Action ფილმები გიყვართ, არ უყუროთ. ეს ფსიქოლოგიური ფილმია, მოქმედება არ ვითარდება დინამიურად. ბევრი რამ არ არის ახსნილი, ქვეტექსტების დონეზეა. თქვენ თვითონ უნდა მიხვდეთ. იქნებ გადაიკითხოთ ისტორია, ვისაც დააინტერესებს.
