# უსათაურო დღეს დილის 5 საათზე ჭექა-ქუხილმა გაგვაღვიძა. მაგარმა წვიმამ დაცხო, ელავდა, თითქოს მთელ სვანეთს პასპორტის ფოტოებს უღებენო (აი, ტიტვლებმა რომ გადაიღეს სურათები, პიჯაკებს მერე ჩაგაცმევთო - ეტყობა მაშინაც ეგეთი ამინდი იყო). დილა სველი იყო, ყველანაირი გაგებით. გუშინ შიომღვიმეში ვიყავით, ძალიან ლამაზი და მადლიანი ადგილია - მაგრამ მაინც პატარა უსიამოვნება შემემთხვა საღამოს - ეტყობა მთლად სუფთა არ ვარ უფლისა და სინდისის წინაშე. ამ ბოლო დროს სიზმრებს ვხედავ. ფერადს, ცოცხალს, ისეთს, როგორიც არასოდეს მინახავს. არადა, ბოლო 5 წელია მგონი არაფერი დამსიზმრებია მალევიჩის შავი კვადრატის გარდა. და აი ეხლა, წელს, ომის მერე - თითქოს შენ გადმომდე სიზმრები, ან უბრალოდ საზრდოს აძლევ ჩემს სიზმრებს. ნეტა, რას გვეუბნება სიზმრები?